Majna mij barggap?

Næhttabielen www.utsattmann.no oadtju sij gudi li illastibmáj vaháguvvam, sijá lagámusá ja fáhkabirrasa diedojt råhtsatjimij birra, sierraláhkáj báhtjaj/ålmmåj gáktuj. Dåppe máhtá låhkåt ietjá vaháguvvamij subttsasijt, ja danna la gatjálvis- ja vásstádusdievnastus, majt dåhkki adnet namá dagi.

Mij lip vájaldimguojmme gudi viehkedi vaháguvvam ålmmåjt ja sijá lagámusájt máhttsat ruopptot buorre iellemij. Mijá ájádus la ij aktak dåbdå duobddágav buorebut gå sån guhti iesj la dåppe váttsatjam.

Miján li tjiehpes lågådalle gudi skåvlåjt guossidi ja sæbrri fáhkabiejvijda ja barggojuohkusijda. Iehtjama histåvråj ja vásádusáj baktu vágodip ietjá gilladiddjijt, sijá lagámusájt ja fáhkaulmutjijt iesjguhtik aktijvuodajn.

Ietjama histåvråj baktu duon dán mediján sihtap vuojnnusij buktet jut seksuálalasj råhtsatjime báhtjaj ja ålmmåj vuosstij la sieldes stuorra ja gássjelis ássje. Mij duodaj jáhkkep råhtsatjimijt galggap hållamijn gåddet, ij sjávot årromijn.

Næhttabielle mij hekkajt gádju

Jådedit næhttabielev www.utsattmann.no la mijá ájnnasamos doajmma. Ájn la garvatjibme ja skábmo tjanádum subtsastibmáj råhtsatjimij birra ja mij jáhkkep dát la ájn gássjelabbo ålmmåjda. Moadda ålmmå li viehkev oadtjum subtsastittjat seksuálalasj illastimij birra, gå li tjiehkusin iehtjádij vásádusáj birra dán næhttabielen låhkåm. Gå diehti sij ælla aktu, ja gå gulli iehtjáda muodugasj subttsasij li bierggim ja buorre iellemav oadtjum, de dát viehket sijáv doarrot åvdepájge skåjvij vuosstij. Dálla li muhtema sijájs vájmmelit maŋen jådedimen Vaháguvvamålmmåv.

Diehtojuohkem fáhkaulmutjijda

Lågådallamij baktu fáhkabiejvijn ja barggojuohkusijn mij subtsastip varresvuohtasuorge, Nav ja skåvlå fáhkaulmutjijda gåktu li mijáv duosstum iesjguhtik ásadusájs ja majt mij lulujma sihtat ietjá láhkáj. Juoga la buorre, valla ållo luluj máhttelis buoreduvvat. Mijá ulmme la dá dåjma galggi sjaddat ájn buorebu ja jut ásaduvvi rijkav miehtáj, vaj ájn ienebu lulun oadtjot dáv máhtov.

Hieredimbarggo

Hierediddje diehtojuohkembarggo la Vaháguvvamålmmå rahtjama oajvvesuorgge. Mij skåvlåjt guossidip ja ietjá sajijt gånnå máná ja nuora li, juogadittjat iehtjama vásádusájt. Seksuálalasj råhtsatjimijt galggá hållamijn gåddet, ij sjávujn. Jus oadtjop báhtjajt ja næjtsojt duostatjit subtsastit jut sij illastuvvi jali li illastuvvam, de lip iehtjama ájggomusájn vuorbástuvvam. Dát máhttá liehket ájbas mierrediddjen jus sij máhtti buorre iellemav oadtjot. Ja ájnnasamos jus illastimijt la máhttelis ganugahttet.

Organiserim

Vaháguvvamålmåj la sierra ideála organisasjåvnnå, mij ij ávkástalá ruhtabátsov. Stivrra jådeduvvá stivras mij la virggáj biedjam bæjválasj jådediddjev guhti galggá bæjválasj dåjmav háldadit. Dåjma tjadáduvvi rijkav miehtáj, valla oajvvekontåvrrå la bájken Flekkerøy. Vaháguvvamålmåj ruhtaduvvá almulasj rudáj, sebrulasjvuodamávsoj ja bálkkáj dåjmaj åvdås, dagu lågådallamijs ja oassálasstemijn duon dán ásadusán.

Sihkarastátjit dåjmav de lip gijttevattja jus ulmutja sæbrri doarjjasebrulattjan, jali vaddi ekonomalasj vattáldagáv kontonummarij 3090.14.79468 jali Vipps-nummarij : 88670.

Vaháguvvamålmmå histåvrå birra

Gidán 2009 oassálasstin 20 báhtja ja ålmmå, gudi lidjin seksuálalasj råhtsatjimij vaháguvvam, prosjæktaj Gradert Info. Ájggomus lij rádev vaddet oajválattjajda mij guosská mij la dárbbo dahkat vaj ienebu duossti diededit jut sij li råhtsatjimijda vaháguvvam ja makkir viehkke luluj doajmmat buoremusát. Akta sijá ájnnasamos rádijs lij næhttabájkev ásadit, gå nav gallegasj ålmmå doarjjaguovdátjijs viehkev åhtsi. Dát galgaj liehket nasjonála næhttabájkke majna la nav álkke gå máhttelis aktijvuodav oadtjot. Dakkár næhttabájkke masi viehkkeásadusá máhttin vuosedit klientajt ja næhttabájkke gånnå fáhkaulmutja máhttin ienep máhtov viedtjat buorebut dádjadittjat báhtjajt ja ålmmåjt gudi li illastibmáj vaháguvvam.

Aktisasjbarggoguojme

Seksuálalasj råhtsatjimij vaháguvvam ålmmå lidjin njunnjutjin næhttabájke åvddånimes, muhtema sijájs lidjin huj dåjmalasj oassálasste. Prosjækta álgaduváj ja jådeduváj ásadusás Forandringsfabrikken, aktan ásadusáj Senter for seksuelt misbrukte menn ja Kirkens Ressurssenter. Duodden lidjin prosjæktajuohkusin maŋen Reforma åvdåstiddje, FMSO stivrra ja BUFdir. Mánáj-, nuoraj- ja familljadirektoráhtta ruhtadij vijddásap åvddånahttemav næhttabieles utsattmann.no jagijn 2015 ja 2016.

Sidá gus viehkedit?

Vaháguvvamålmmå dåjmadus åhtså aktijvuodav ietjá vaháguvvam ålmmåj gudi sihti oassálasstet tjállusij råhtsatjimij birra báhtjaj ja ålmmåj vuosstij, jus soajttá sidá subttsasijn ietjat birra. Dån iesj vállji jus sidá liehket namádis jali jus vuoseda ietjat muodov.

Jus la miella, de sáddista e-påstav diehki: post@utsattmann.no. Tjálesta telefonnummarav jus sidá de máhttep ságastallat.

Guládalá mijájn

  • Jarle Holseter

  • Arild Hovden

  • Raymond Lønberg

  • Odd Sverre Pedersen

  • Bjørn Aasmoe

  • Svein Schøgren

  • Øyvind Valrygg